“ Lu minnulu sciurutu di Sicilia “
Quannu nill'aria s’accumincia a rispirari ,
la mitizza di lu suli
e la brizza di lu mari;
é tannu ca sentu lu sciaguru
di la me Sicilia bedda
ca la giuvintù mi fa turnari a disiari.
Lu sciaguru ca nesci di sta terra prena,
si spanni nni l’aria di lu matinu
e tuttu s’arruvigghia
ccu lu friscu accucchiatu nni la notti.
Chista è la natura,
ca nasci, crisci e si rinnova.
Chistu è lu misteru di la me terra
ca nni la stagiuni di l’amuri
e mizzu a tanta meravigghia,
fa fistinu ppì lu minnulu sciurutu.
Ppi tuttu quantu ancora vaiu a cuntari …
lu minnulu in sciuri
nasci di na storia cummuventi
d’antica cunuscenza
ca purtava tanta cumparanza.
Storia d'amuri e di tristizza
di dui nobili picciutteddi
di la Grecia antica
di Acamante e di Fillide,
trasfurmata chista in minnulu sciurutu.
Tragedia … granni,
cuntata dall'antichi di na vota,
di chisti sfurtunati amanti…
iunciuti da grannissimu sintimentu
ppi lu signali ca lassaru
a tutti li picciutteddi innammurati.
Chistu è lu cuntu …
ca tutti chiamanu liggenda.
Chista è na storia d’amuri e di rispittu,
c’ogni annu s’arripeti
appena sta arrivannu a primavera,
timpu … di spiranza e di custanza…
ca la giuvintù’arruvigghia e ncanta …
disiusa di truvari nni la via
na nova meta …
c’ avvicina a la vita.
Nessun commento:
Posta un commento