Caltanissetta ... terra di Sicilia.
La me terra
Cumu ti viu diversa terra di li me vicchi,
ti manca qualchi cosa ca nun sacciu,
forsi li festi di navota e la divuzioni vera ?
o ti manca lu curaggiu e l’omini cu li pantaluna diritti?
Eppuru, quannu l’allegria ni pigliava tutta la famiglia, stavamu a pinsari
di la festa ca stava p’àrrivari,
e la genitura cuntenta d’aspittari, chiamava la festa cumannata
p’adurari li divoti sò ca sempre l’avivanu aiutata.
“Ni stavanu nzignannu a rispittari li Santi giusti “;
Ni vulivanu diri d’amari la Madonna
c’anzimi a San Giuseppe e lu Signuruzzu
furmavanu na famiglia vera .
Eranu antri timpi e,..oggi, tanta genti stenta a ritruvari la so strata.
Pinsu puru a quannu l’amici eranu accussì sinceri,
ca parivamu essiri tutti parinti stritti
e cuntenti n’ammitavamu scanciannuni li festi cumannati.
Ora ca tuttu stu timpu se n’è gghiutu
scinnu ni stà città sulu pi ritruvarla ni li strati di navota,
pi vidiri si li casi sunu, ancora addritta ,
pi sentiri si lu sciaguru c’ è ancora e ritruvari la memoria antica.
Ma pò …minn’addugnu ca mi paru un carusiddu,
cun cori divintatu nicu nicu, ca la scinnuta me, è sulu n’illusioni
pi truvari,dopu tant’anni,chiddu ca nun sacciu ancora,
O… forsi ppì ritruvari,ni ddì stratuzzi stritti, li me iorna veri .
Salvatore Casales. :
Nessun commento:
Posta un commento